До крајот на годината телекомуникациската кула на врвот на Водно ќе се изгради до височина од 72 метра, а до крајот на изградбата, што се очекува да биде ноември 2018 година, кулата ќе ја достигне крајната височина од 155 метри и ќе биде највисокиот објект од овој вид во Македонија.
Од Агенцијата за електронски комуникации (АЕK) велат дека изградбата на објектот, кој официјално се вика Антенски систем за контрола и мониторинг на радиофреквенции на територија на Република Македонија, се одвива непрекинато и во согласност со проектната документација и динамиката на работа доставена од изведувачот „Гранит“.
Од АЕK објаснуваат дека основна намена на кулата е поставување софистицирана мерна телекомуникациска опрема, со чија помош ќе може да се прави мониторинг на ниските, средните и ан високите фреквенции. Со тоа поефикасно ќе се контролира емитувањето на радиофреквенциите што ги користат операторите на јавни комуникациски мрежи и услуги, јавниот радиодифузен сервис и трговските радиодифузни друштва. Kако што велат, ова ќе придонесе за намалување на можноста за појава на разни штетни интерференции.
Објектот е од армирано бетонско јадро со висина од 112 метри, во кое се сместени вертикалните комуникации, скалите и двата лифта. На висина од 57,76 метри е поставена конзолна платформа со површина од 200 квадрати, на која треба да се поставува телекомуникациската опрема. Следните две платформи се на височина од 66,88 и 76 метри. Последната платформа ќе биде изградена на височина од 85,12 метри, од која последните 2 метра од површината се предвидени да ротираат околу оската на јадрото.
Објектот ќе има и придружни содржини во приземјето: помошни простории, електроблок за непрекинато напојување, резервоари за техничка вода, како и простор за контрола и мониторинг на објектот. Над приземните содржини ќе има голема тераса.
Kамен-темелникот на телекомуникациската кула беше поставен на 10 октомври 2013 година.
