Нов скандал на Гинекологија: Родители тврдат дека им го изгубиле бебето

 Јован Волчев од Скопје цел ден барал да ја види ќерката што се родила вчера.

По неколкучасовни шетања низ клиниката и расправии со медицинскиот персонал каде е новороденчето, на крај му покажале бебе на кое пишувало Василевска па прецртано и напишано Волчева. Јован, видно вознемирен, по се што слушнал денеска се сомнева дека ја видел својата ќерка, јавува Сител.

- Ми рекоа во девет часот има визита дојдете подоцна, отидовме во десет и тогаш ми викаат такво бебе со тоа име нема, но дојдете накај 11.30, отидовме и пак викаат не може да го видите заради историјата на мајката, а подоцна кога ве повикав и вас ми покажаа бебе со презиме Василевска, но од кај да знам јас дека тоа е мое бебе може има повеќе Василевски во болницата, вели Јован Волчев.

Тој е револтиран зошто ги излажале дека бебето е кај мајката, кога неговата сопруга која била породена со царски рез е на одделот за Интензивна каде не носат новороденчиња, а таа го тврди спротивното.

- И она не го видела од вчера, сака да го види, вели Јован кој повикал и полиција која дошла на Гинекологија, направила записник и земала изјави од сите инволвирани страни.

Вели дека ќе бараат и ДНК тест за да знаат кое дете ќе го изнесат од болница. Покрај со медицинскиот персонал, Волчеви имале проблем и со клиничкото обезбедување кое според изјавите на пациенти биле под дејство на алкохол, а и се закануваа и на екипата на Сител употребувајќи вулгарни зборови.

- Ме туркаа, беа некултурни, а и мирисаа на алкохол, вели Јован.

Од ГАК за Сител изјавија дека немале сериозен проблем со бебињата и дека се настанало поради гужвата на клиниката и недоволниот број на медицински персонал. За една недела ова е втор скандал на Гинекологија откако претходната недела имаше замена на новороденчиња, кое за среќа заврши без сериозни последици.