Која е тајната на среќните љубовни парови?

Среќните парови се караат околу домашните обврски и парите. Понекогаш си кријат работи, а и си одат меѓусебно на нерви.

Еве ја вистинската тајна на среќните парови: Тие не се секогаш среќни, само успешно балансираат помеѓу негативното и позитивното. Психолозите сметаат дека е возможно да се одржува успешна врска само доколку и двајцата партнери имаат волја да работат на врската. Па во што е тајната на среќните парови?

„Добра“ кавга

Бројот на кавги нема никаква врска со квалитетот на врската. Најважен е начинот на кој двајцата се расправаат. Успешните парови избегнуваат драматични кавги и на секој конфликт му пристапуваат конструктивно, затоа што знаат дека меѓусебното обвинување нема далеку да ги однесе.

Посветеност и забава

Среќните парови често си покажуваат мали знаци на нежност. Знаат заедно да се забавуваат. Не си легнуваат лути и највеќе од сѐ го ценат времето кое го поминуваат заедно. Среќните парови едноставно се посветени едни на други. Експертите се сложуваат дека врската или бракот ќе успеат само доколку партнерите имаат заедничка перспектива. Иако посветеноста би требало да е очигледна, многумина успеваат да ја превидат.

Интимност

Иако не е апсолутен предуслов, поголемиот дел од среќните парови имаат задоволувачки интимен живот. Секој пар би требало да ја стави интимноста високо на листата на приоритети. Интимноста помеѓу двајца луѓе е важна во одржување на страста и блискоста.