Јавната администрација куртули од намалување на платите

Техничкиот премиер Оливер Спасовски денеска го најави вториот пакет-мерки за економијата за справување со кризата со коронавирусот. Ќе се субвенционираат платите и придонесите на работниците.

Платите на вработените во јавната администрација нема да се кратат, но сите државни функционери, од шефот на државата, преку премиерот, министрите, директорите и градоначалниците во локалната самоуправа, во следните месеци ќе земаат минимална плата од 14,500 денари. Премиерот Оливер Спасовски денеска ги најави новите мерки и повика на солидарност од сите во општеството за надминување на кризата која ја предизвика пандемијата на коронавирусот.
Мерката за намалување на платите во јавната администрација ја предлагаше владејачката СДСМ, а Спасовски вели дека при носењето на владините мерки се консултирани сите водечки експерти и стопанственици во државата. 
Во пакетот влегуваат серија мерки кои меѓудругото предвидуваат:

  • Финансиска поддршка за приватните фирми за исплата на плати на работниците за април и мај, и субвенции до 50% за придонесите. Сите фирми кои ќе добијат поддршка имаат обврска да го задржат истиот број вработени до септември годинава. Услов од владата се овие фирми да не исплаќаат дивиденди. Од враќање на помошта ќе бидат ослободени фирмите кои годинава ќе прикажат загуба;
  • Спортистите и уметниците во следните два месеци ќе добиваат минимална плата од 14,500 денари;
  • Граѓаните што останале без работа ќе добиваат плата од државата во висина од 50% од нивната просечна плата во следните 6 месеци;
  • Сите избрани функционери ќе примаат минимална плата во април и мај. Мерката не ги опфаќа вработените во здравството;
  • До крајот на јуни се запира закон за извршување;
  • Се одложува отплатата на кредити кај банките за правни и за физички лица, за период од 3 до 6 месеци;
  • Бескаматни кредити за микро, мали и средни претпријатија, на три години со грејс период од 12 месеци.

Владата донесе одлука да се формира и солидарен Ковид-19 фонд во кој ќе влегуваат сите донации од правни и физички лица за справување со коронавирусот.