Објектот „Пчелка 2“ во рамки на градинката „Буба Мара“ во Општина Аеродром од затоплување со нафта преминува на инвертер-клими. Градинката што се наоѓа во населба Лисиче денеска ја посетија градоначалникот на Општина Аеродромм Златко Марин и заменикминистерот за животна средина и просторно планирање Јани Макрадули. Како што соопшти Општина Аеродром, инвертер-климите се донација од Министерството за животна средина и просторно планирање, а со новиот начин на загревање се очекува покрај намалување на трошоците да се придонесе и за заштита на животната средина
– Со ова Општина Аеродром ќе штеди пари. Досега во текот на зимскиот период се трошат околу 14 тони нафта, тоа е некаде околу 12,5 илјади до 13 илјади евра. Сега со помош на имплементацијата на планот за чист воздух сметките ќе бидат четири пати поевтини, изјави заменикминистерот Макрадули. Повеќето објекти на основните училишта и градинките на територијата на Општина Аеродром се затоплуваат преку централното градско греење. Минатата година подрачното Основно училиште „Гоце Делчев“ во Долно Лисиче од загревање со нафта, премина на загревање со пелети.
– Општина Аеродром континуирано работи на обезбедување нови еколошки начини на загревање во градинките и училиштата, изјави градоначалникот Марин. Остануваат уште два објекта кои во текот на следната година од нафта ќе преминат на нов начин на затоплување, со што во Општина Аеродром нема да постои јавна установа што се загрева на нееколошки начин.
Градоначалникот Марин посочи дека Општина Аеродром има издвоено околу 25 милиони денари од буџетот за заштита на животната средина. Општината изминатиот период додели субвенции за набавка на велосипеди, печки на пелети, инвертер-клими и чистење оџаци, со што значително се придонесува во зачувувањето на животната средина. Периодов се спроведува голема акција за засадување на 5.500 зимзелени и листопадни дрвја. Во сите објекти на градинките се поставени прочистувачи на воздух. Редовно се чистат депониите кои се создаваат на територијата на Општината, а инспекциските служби работат во две смени, како и за викендите.
