Марш на „црвените чадори” денеска по деветти пат се одржува во Скопје, по повод Меѓународниот ден против насилството врз сексуалните работнички.

Годишното мото е „Слободниот избор е право, а не привилегија“, а присутните носат и транспаренти како „Мое тело мој бизнис”. Со маршот, сексуалните работници сакаат да покажат дека се под постојана закана од насилство, поради негативната перцепција во општеството за нив.

-Би сакале да ја подигнеме јавната свест за постоењето голем број сексуални работници во Македонија и да ја потенцираме застрашувачката состојба за безбедноста и супстандардните услови во кои што тие живеат и работат. Сексуалните работници остануваат меѓу најмаргинализираните членови на општеството. Креаторите на политики и властите повеќе ги сметаат за непријатна појава што треба да се искорени или за неморални прекршители на законот, отколку за индивидуи кои треба да бидат заштитени од насилство и кои треба да добиваат социјална и економска помош и поддршка- велат од Граѓанската иницијатива за заштита, промоција и унапредување на правата на сексуалните работници СТАР-СТАР од Скопје, кои се организатори на маршот.

Повеќе фотографии во целата галерија на Скопје Инфо.