Тетовска „Шкендија“ следните шест натпревари како домаќин ќе ги одигра без присуство на публика откако Дисциплинската комисија на ФФМ го казни овој клуб.
Казната е како резултат на инцидентите што се случија за време на реванш полуфиналето во Купот на Македонија меѓу Шкендија и Вардар, кога по конфликтот меѓу двајцата капитени Бобан Грнчаров и Ферхан Хасани на терен влегоа дел од навивачите.
Судијата на натпреварот Александар Ставрев го прекина дуелот, а нешто подоцна продолжи. Висината на казната е како предупредување до тетовскиот клуб дека вакви случки можат да донесат и инцидент од далеку поголеми размери.
Ова значи дека денешното дерби дуел од првенството меѓу Шкендија и Вардар ќе се игра без гледачи, како и сите натпревари на Шкендија до крајот на шампионатот. Воедно, казната ќе биде и за првиот дуел од новото првенство.
Шкендија има право на жалба, но казната може да биде само намалена.
