Последните години во Македонија најмногу се исплати да си пејач или спортист.
Во земјава добро се заработува и во филмската дејност, односно продукција на видеопрограми и на телевизиска програма, но и снимање видеоспотови.
И платите во маркетиншкиот сектор пораснале за 19 проценти. Рударите, имаат за 16 проценти повисоки плати. Вработените во преработувачката индустрија пред четири години, во просек, земале 15.500 денари месечно, а сега околу илјада денари повеќе.
Законот за минимална плата придонел и за пораст на примањата на едни од најслабоплатените – текстилците.
Во делот на производство на храна и на пијалаци, вработените сега имаат за 2 илјади денари повисоки плати.
Според официјалната статистика, градежниците сега земаат 3 илјади денари повеќе, а трговците малку над илјада денари.
Последните години има професии што забележале голем пораст во примањата иако на врвот на листата на најплатени сѐ уште остануваат менаџерските позиции, како и лицата вработени во ИТ секторот, телекомуникациите, фармацијата. Тие се неприкосновени во поглед на висината на примањата.
Што се однесува до податокот дека последните четири години е забележан голем скок на приходите кај пејачите и кај спортистите, тоа само докажува дека се доближуваме до светските трендови што диктираат овие дејности да се најдоходовни. Во светот секој сака да биде пејач, фудбалер или кошаркар бидејќи тие се меѓу најбогатите луѓе. Не дека досега нашите пејачи не заработуваа добро, но тоа беше далеку под тоа што го заработуваат, да речеме, пејачите од Србија.